Annars er þessi vika búin að vera furðulega fljót að líða. Mér fannst alveg glatað að það væri bara mánudagur þegar ég bloggaði síðast, en svo er bara allt í einu kominn fimmtudagur og helgin framundan. Ég hef ekkert verið að dunda mér í púkaherberginu þessa vikuna. Ég var frekar löt á mánudag og þriðjudag svo þeir dagar fóru eiginlega bara í ekki neitt.

Í gær hitti ég svo gamlar Bautaskvísur, þær Guðrúnu, Birgittu, Hörpu og Guðrúnu Hrönn. Það var mikið spjallað og borðað. Ofboðslega gaman að hitta þær svo stefnum við bara að því að hafa þetta reglulega. Mér líst bara rosa vel á það. Ég tók með mér myndavélina, en tók engar myndir. Alveg glötuð.

Svo á mánudagskvöldið fórum við Helgi uppá fæðingadeild að skoða aðeins aðstöðuna og svona. Ég er ekki frá því nema það hafi komið svona nettur fiðringur í mann. Þá fyrst varð þetta raunverulegt eiginlega. Núna er ég alveg að missa mig í upplýsingasöfnun fyrir fæðinguna. Slökun, öndun og allt þetta. En það er rosa gott að vera búin að fara þarna uppeftir og sjá þetta allt. Á örugglega eftir að hjálpa manni þegar að þessu kemur. Ég verð samt að passa mig að fara ekki í að bíða. Ég held ég endi á geðdeild ef ég byrja að bíða. En mér finnst hvort sem er ekkert allt vera tilbúið, svo ég hef svo sem nóg að gera fram að fæðingu.

Púki er annars farin að heimta ansi mikið pláss. Spurning hvort það hafi lengdina frá pabba sínum. Það nær alla vega að spyrna sér svona rétt undir rifbeinin hægra megin og svo er rassinn alveg vinstra meginn. Svo teygir það svona úr sér í smá stund en ég kvarta ekki svo lengi sem það lætur rifbeinin í friði. En það er örugglega ekki langt í að það breytist. En ég held það sé ekki búið að skorða sig ennþá, enda nægur tími til þess.

En jæja.. held þetta sé fínt í bili. Njótið helgarinnar

En við fórum á laugardaginn og versluðum aðeins fyrir púka. Keyptum lak á rúmið og vögguna, taubleyjur, þvottapoka og eitthvað fleira. Svo núna fer maður bara að fara að þvo fötin held ég. Ég kannski næ að geyma það aðeins lengur, sjáum til Ég setti smá lista yfir hugmyndir hvað okkur vantar fyrir púkann, fyrir þá sem hafa áhuga á að skoða það, þá er bara að smella hér eða smella á bumbupúki hérna efst á síðunni.

Annars er síðasta vikan í meðgöngusundinu í þessari viku. Ég held samt að ég taki annað námskeið fram að fæðingu. Þetta er svo hressandi og hrikalega skemmtilegt.

Ég hef annars ekkert að segja. Það er ekki mikið spennandi sem gerist hjá mér þessa dagana. En ég lofa þið missið ekki af því ef eitthvað breytist hehe

-Svo bara kvitta-

Við erum svo að pæla í að fara uppá fæðingadeild að skoða í næstu viku. Það er nefninlega búið að vera nemi hjá ljósunni okkar, og hún er að vinna á mánudag og vildi endilega fá okkur þá. Ég hugsa að við förum þá, það verður ágætt að hafa einhverja sem maður kannast við þarna.
Annars er lítið annað í fréttum. Næturnar eru orðnar aðeins öðruvísi en ég er vön. Ég er farin að vakna oftar og svona. Tala nú ekki um brjóstsviðann. Hann er orðinn ansi öflugur svona rétt fyrir svefn. En ég er alls ekki að kvarta. Þetta er hluti af ferlinu sem gengur yfir.

Ég hef ekkert meira að segja, svo ég læt þetta duga í bili. Endielga kvittið

Í dag setti Helgi saman rimlarúmið og setti gardínustöngina upp. Ég var búin að sauma gardínurnar svo þær eru komnar upp. Ég saumaði svo í dag smá svona stuðkant inní vögguna. Þannig að núna á ég bara eftir að  sauma utan um gjafapúðann. Ég verð að geyma eitthvað þangað til í febrúar. Hehe En þetta er allt að smella saman.

En mér er svo agalega farið að klæja í puttana yfir klippileysi. Væri alveg til í að vera að klippa eitthvað. Svo ef jólaklippingin er útrunnin hjá ykkur, þá bara bjalla á mig hehe.

Annars er ég búin að setja inn myndaalbúm fyrir 2010 og þar eru nokkrar nýjar myndir af herberginu. Það er sama lykilorð og er á 2009 albúminu, svo ykkur sem vantar lykilorðið, endilega bara hafið samband.

Held þetta sé gott í bili.

Svo endilega bara kvitta

Það er samt frekar skrítið að vera ekkert að vinna. Suma daga hefur maður sig ekki í að gera neitt og svo aðra daga er maður alveg eins og brjálæðingur í öllu og vill helst klára allt 1,2 og 5. En svo reyni ég að dreifa þessu á dagana. Ég skráði mig í meðgöngusund og það eru 4 vikur, 2 sinnum í viku. Fyrsti tíminn var í gær og bara rosa gott að komast aðeins í hreyfingu og svona læra inn á mjaðmagrindina. Mér finnst ég svo sem ekki alveg fatta hvar verkirnir eru, ef þeir eru. Ég hef yfir engu að kvarta. Við fengum flotta skoðun hjá ljósmóðurinni okkar hérna á AK og allt kom vel út, svo við vorum bara ánægð með það. Ég sef líka ágætlega á næturnar svo ég held ég geti bara verið sátt við lífið.

Helgi er hins vegar uppteknasti maðurinn á Akureyri þessa dagana. Ekki nóg með það að hann er að vinna alla virka daga frá 9-17 þá er hann að byrja að æfa með meistaraflokki Þórs í körfubolta. Plús allt sem þarf að gera og ég fæ að sjá hann milli 22-23 á kvöldin, rétt áður en ég sofna. Ég á nú eitthvað eftir að tuða yfir þessum æfingum samt hehe. Svo miðað við þetta höfum við ekki enn haft tíma til að taka bumbumyndir, en ég ætla í alvörunni að reyna í þessari viku. Ef Helgi verður sjáanlegur heima

Þetta er það sem hefur gerst hjá okkur svona síðustu 2 vikurnar. Segi þetta gott í bili. Endilega kvittið

Febrúar – Við fluttum suður og komum okkur ágætlega fyrir í kósý íbúð á Álftanesinu. Það var frekar langt fyrir okkur að fara í vinnu, en stutt fyrir mig í skólann svo það var einhver málamiðlun. Ekki skemmdi svo fyrir að við vorum bæði að vinna í vesturbænum, svo þetta voru engar krókaleiðir sem þurfti að fara, en þó slatta vegalengd.
Við stelpurnar í skólanum stofnuðum hljómsveitina Struggling Lovers og tókum þátt í undankeppni Iðnskólans fyrir Söngkeppni FF. Við lönduðum þriðja sæti og geri aðrir betur segi ég nú bara. Þetta var algjör snilld og ég er ekki frá því nema ég sakni vitleysinganna hehe.
Hápunkturinn í febrúar var sennilega sá að ég greiddi Jóhönnu Guðrúnu á úrslitakvöldinu fyrir Eurovision þegar hún vann með laginu Is It True. Ég hef bara sjaldan verið jafn stolt af sjálfri mér eins og ég var það kvöld.

Mars – Þá tók ég þátt í InterCoiffure Junior hárgreiðslukeppninni. Þar voru 8 keppendur og þar af 5 frá Akureyri. Ekki slæmt það. Ég var bara nokkuð sátt með mína frammistöðu og alltaf gaman að taka þátt og læra og sjá eitthvað nýtt. Margt flott að gerast og fullt af flottu hárgreiðslufólki að gera flotta hluti. Mamma átti afmæli 10. Mars og var svo sem ekkert haldið uppá það neitt sérstaklega.

Apríl – Páskarnir gengu í garð og það var bara ágætt að gera í fermingargreiðslum í vinnuni. Daníel bróðir fermdist líka og var það allt saman yndislegur dagur. Hann rosa ánægður með daginn fékk að sjálfsögðu fullt af gjöfum. Pabbi átti afmæli 10. Apríl og var heldur ekki mikið haldið uppá það. Elsa systir kom heim í ferminguna hans Daníels og kom Silje vinkona hennar með henni. Ég hitti þær voða lítið en það stutta sem við náðum að hittast var frábær tími. Alltaf gaman að hafa Elsu systir á landinu

Maí – Önnin í skólanum að verða búin að líða fór að sveinsprófsundirbúningi. Mér gekk rosa vel í prófunum og fékk að taka sveinsprófið þann 16. Maí. Ég fékk 4 daga fyrirvara um að ég mætti taka prófið í maí, með mínum útskriftarhóp svo ég tel það ansi gott að hafa náð að redda öllum módelum og öllu með svo stuttum fyrirvara. Ég útskrifaðist svo úr Iðnskólanum með hæstu einkunn þann 21. Maí. Kom mér frekar mikið á óvart, en ofboðslega var ég stolt af sjálfri mér. Þetta var klárlega einn af hápunktum ársins.
Eftr útkskrift tók svo við full vinna á Salon Reykjavík og klára samninginn minn.

Júní – Helgi minn átti afmæli þann 12. Og náði 26. Aldursári. Uppá það var haldið með smá út að borða, ekkert of fínt samt. Svo fórum Við Helgi í sumarfrí 15. Júní í 2 vikur. Það var rosalega kærkomið því mikið hafði verið að gera hjá okkur báðum. Við fengum tjaldvagninn hjá mömmu og pabba lánaðann og keyrðum suður fyrir landið og stoppuðum hér og þar. Keyrðum svo Austfirðina og enduðum á Akureyri og vorum þar þangað til fríið var búið. Þetta var snilldar frí og yndislegur tími sem við áttum saman.

Júlí – Var vinnumánuður sumarsins. Við tók fullur vinnumánuður og hann var hryllilega lengi að líða. Ekki svo mikið var að gera í vinnuni, ofboðslegur hiti og fólk að njóta veðursins, en ekki að hanga í klippingu. 7. Júlí áttum við hjónin 2ja ára brúðkaupsafmæli og héldum við uppá það með því að fara á Hlöllabáta í rómantískann hádegismat. Hehe Svo var smá hittingur hjá sistkynum mömmu í sveitinn hjá Nonna frænda. Það var algjör snilldar helgi og Helga frænka og Josef komu frá útlöndunum og tilkynntu um trúlofun.
Ég átti afmæli, 24. ára skvísan og var það bara ágætis afmælisdagur. Daníel bróðir átti svo afmæli 26. júlí og varð árinu eldri
Um miðjan mánuð komumst við svo að því að nýr fjölskyldumeðlimur væri væntanlegur. Einóm gleði ríkti og erfitt var að halda kjafti yfir spennandi fréttum og halda andliti, þar sem þreyta var áberandi og mikið ljótutímabil í gangi. Þessar fréttir voru einn af hápunktum ársins.

Ágúst – Um verslunarmannahelgina fórum við vestur á Ísafjörð og vorum hjá afa og ömmu Helga. Kíktum á Mýraboltann og höfðum það notalegt. Þvílíkt dekur sem var hjá ömmunni og afanum. Svo keyrðum við norður til Akureyrar og vorum þar þangað til sumarfríið var búið. Þegar suður var komið aftur, tók bara við vinna og kósýheit. Mér fannst frekar skrítið að enginn skóli væri að byrja hjá mér, en fannst það líka bara mjög fínt.

September – Fórum við í fyrstu mæðraskoðunina okkar og fyrsta sónarinn. Yndislegt var að fá að vita að allt væri í góðu með púkann og maður mátti byrja að segja frá. Ég var öll að koma til og sem betur fer komst ég yfir ljótuna eftir því sem leið á mánuðinn. Ég tók við sveinsbréfinu mínu og við Helgi héldum uppá það með því að fara út að borða á Argentínu Steikhús og svo á Hellisbúann í leikhús. Snilldar matur og snilldar sýning. Elsa systir kom heim til landsins og var í slatta tíma. Enda voru 2 landsleikir hjá Krissa svo hún kom með honum og fóru þau saman út aftur. Yndislegt að hafa þau öll.

Október – Helgi var farinn að þurfa að fara oftar norður til AK að sinna vefþættinum hans og Helga Steinars. Það þýddi að ég var ansi mikð ein heima og öfundsjúk yfir tíðum ferðum hans norður. Ég komst þó eitthvað með honum. Ég byrjaði að blogga meira og hugsa aðeins betur um síðuna eftir pínu pásu. Loksins var komin lögleg bumba svo hægt var að byrja að taka bumbumyndir.

Nóvember – Það styttist óðum í flutninga og ég var byrjuð að skipuleggja að pakka niður og svona. Nóvember var rosalega fljótur að líða og áður en ég vissi af var mánuðurinn búinn og desember byrjaður.

Desember – Var frekar strembinn, enda jólatörnin að byrja í vinnuni, pakka niður búslóðinni, þrífa íbúðina og flytja. Við fluttum 18. Desember allt dótið norður og Helgi fór með í þeirri ferð. Ég var í RVK til 23. Desember og flaug þá norður. Ég er búin að blogga um desember svo ekki þarf ég að lista betur hvað gerðist þann mánuðinn

En takk fyrir skemmtilegt ár 2009, megi 2010 vera enn skemmtilegra.

Ég er búin að setja inn myndir frá jólunum og áramótunum inní myndir 2009

Ég setti líka inn smá (en samt frekar langan) annál frá árinu 2009 fyrir þá sem vilja lesa. Ég setti hann í sér flokk svo það er bara að smella á “Árið 2009″ hérna efst á síðunni eða bara hérna.

Endilega kíkið og kvittið í leiðinni!

Annars voru jólin yndisleg í alla staði. Verst hvað Elsa systir og co stoppuðu stutt og endalaus veikindi heima hjá mömmu settu pínu strik í reikninginn. Ég og Helgi höfum alveg sloppið, sem betur fer. Og best að láta 7,9,13 fylgja En það var samt ofboðslega gott að hafa Elsu og þau hérna heima og Alís mín er bara yndisleg! Hún er á svo ótrúlega skemmtilegum aldri að það er endalaust hægt að brasa með henni og dunda. Þó ekki sitja kyrr og horfa á sjónvarpið. Það þarf alltaf að vera að gera eitthvað í leiðinni. Hehe

Svo núna er ég bara að dunda mér á daginn. Ég veit ekki hvort ég nái að gera það í 9 vikur í viðbót. En ég verð bara að vera dugleg að finna mér eitthvað að gera. Ég er búin að kaupa gardínuefni til að sauma gardínur inn í barnaherbergið og er svo að leggja lokahöndina á teppið sem ég er að prjóna. Ég veit ekki hvað ég geri þegar ég er búin með þetta, hvort ég byrji á einhverju nýju eða reyni að fá einhvern til að kenna mér að hekla. Ef einhver vill bjóða sig fram í það, er ég til í smá grunnheklunámskeið.

En jæja, það þýðir ekki að hanga endalaust á netinu. Er að fara í mæðraskoðun á eftir. Þetta er fyrsta skoðunin á Akureyri svo ég hlakka bara til að hitta ljósuna og svona.

Ég reyni svo að henda inn nýjum myndum fljótlega. Netið er bara ekki alveg komið hjá okkur, þannig að ég geri það ekkert fyrr en það er komið.

Á Aðfangadag hittum við svo aðeins Helgu, Binna og Dag. Fórum með jólagjöfina hans Dags til þeirra og spjölluðum aðeins. Svo hittum við Helga Steinar og svo fórum við í L 16 til að óska öllum gleðilegra jóla áður en við fórum út á Þelamörk að græja okkur fyrir kvöldið. Kvöldið var alveg frábært í alla staði, enda svosem ekki við öðru að búast. Góður matur, fullt af pökkum og yndisleg samverustund með fjölskyldunni. Þetta gerist ekki betra.
Við Helgi fengum fullt af flottum gjöfum, takk kærlega fyrir okkur. Fengum meðal annars myndatöku hjá Palla ljósmyndara í heilt ár frá Tengdó. Við erum svona að ræða það hvort við eigum að byrja núna og fá einhverjar bumbumyndir eða hvort við eigum bara að fara þegar Púki er komin í heiminn. Erum að melta þetta. Svo fengum við barnapíutæki frá mömmu og pabba. Rosa flotta peysu og buxur frá Guðbjörgu og Stefáni, hringlu frá Daníel og samfellu frá Alísi okkar. Svo náttúrulega helling í viðbót sem ekki var handa Púka.

Á Jóladag var svo jólaboð hjá sistkynum mömmu og var það í þetta skiptið haldið hjá Rögnu frænku. Eins og alltaf var bara gott að borða, fullt af kökum og gúmmelaði til að gúffa í sig. Ekki fór maður svangur þaðan. Svo var hangikjöt og meðlæti á Þelamörk um kvöldið.

Annar í jólum var frekar viðburðarríkur. Stefnt var að því að hafa mat í L 16 og svo spila öll saman á eftir. Það fór ekki betur en svo að mamma lagðist í magapest korter í mat, Krissi lagiðst eftir mat og pabbi eftir spil. Svo þetta varð ekki alveg eins og planað var, en skemmtilegt engu að síður. Spiluðum Alias þar sem pabbi, Daníel og Helgi gjörsamlega rústuðu okkur Elsu systir. En bara gaman að því. Maður verður að leyfa strákunum að vinna annað slagið hehe.

Framundan er svo Gamlársdagur og allt sem því fylgir. Við verðum í L 16 í mat og svona. Það verður bara æðislegt. Svo flytjum við í byrjun janúar í íbúðina okkar aftur. Leigjendurnir sem eru í henni fundu sér íbúð sem þau fá um mánaðarmótin, svo við komumst fyrr inn. Ekkert nema gott um það að segja

En þetta er gott í bili. Ágætis runa til að lesa í vinnuni svona milli jóla- og nýjárs hehe

Annars er þetta nú búið að líða frekar hratt og ég get svo sem ekki kvartað, nema yfir því að vera ein og yfirgefin. Hehe.. Allir fyrir norðan og Guðbjörg og Stefán vinnandi, svo þetta er frekar einmannalegt. En það verður laglega bætt úr því, þarsem það er fullt að fólki sem ég á eftir að hitta um jólin. Þetta verður yndislegt.

En ég hugsa að ég bloggi ekkert meira fram að jólum, enda ekki tími til þess né eitthvað til að segja. Ég kannski hendi inn myndum milli jóla og nýjárs og blogg þá jafnvel í leiðinni. Aldrei að vita.

Hafið það rosa gott yfir hátíðarnar og njótið þess að vera með ykkar nánustu.

Gleðileg jól öll sömul!

Það eru bara 3 vinnudagar eftir og svo er ég alfarin til Akureyrar. Það verður algjört æði.
En mamma og pabbi eru í RVK núna. Komu í gær og hjálpuðu okkur að flytja dótið í bílinn og svo erum við að fara í dag og sækja Elsu, Krissa og Alísi á flugvöllinn. Trúi ekki að þau séu að koma, það verður ofboðslega gott að sjá þau. Þau ætla svo að bruna beint norður á meðan ég verð eftir hérna. Væri alveg til í að fara bara með þeim, en það er víst ekki í boði.

Að öðru leyti er ekki mikið nýtt í fréttum. Helgi tók myndavélina norður svo það verða örugglega ekki neinar nýjar bumbumyndir settar inn fyrir jól. En ég kannski set eitthvað inn milli jóla og nýjárs eða eitthvað. Hver veit

Ég ætlaði annars bara að setja inn smá fréttir. Endilega kvitta

• Pakka eldhúsinu, þvottahúsinu, fötunum okkar og baðherberginu niður
• Kaupa límband, merkimiða á jólagjafir og nýja dagbók fyrir árið 2010
• Kaupa jólagjöf handa Helga
• Pakka inn jólagjöf mömmu og pabba og gjöfinni hans Helga
• Þrífa eldhúsinnréttinguna (sjáum hvort ég nenni því)
• Reyna að tæma þennan lista og slaka á ef einhver tími gefst

Spennandi er það ekki? Annars er ykkur velkomið að aðstoða við þrif á íbúðinni og eins auglýsi ég hér með eftir sterkum aðilum sem finnst gaman að flytja og bera kassa fyrir aðra. Það verkefni framkvæmist þann 18. desember 2009 og verða einhver verðlaun fyrir þá sem nenna að koma. Þetta er nú ekki mikið dót og verður því enga stund gert. Þetta getur til dæmis verið eitthvað góðverk sem hægt er að gera fyrir þessi jól. Hehe

Annars bara kvitta þið sem eigið leið hjá Alltaf gaman að fá athugasemdir. Og endilega gefið ykkur fram ef þið viljið hjálpa!

En ég er ss. búin að setja inn könnun líka, svo endilega takið þátt í henni. Langar rosalega að vita hvað fólk er að giska á Ég hitti Helenu “frænku” um helgina því Jórunn frænka kom í stutta heimsókn. Jórunn sagði strax strákur en Helena stelpa. Svo tók Helena hár úr mér og þræddi giftingarhringinn á það. Lét svo hanga yfir maganum og eftir smá stund fór hringurinn mjög ákveðið fram og til baka. Það merkir víst að þetta sé strákur. Ef hringurinn hefði farið í hringi þá væri þetta stelpa. Hvort ég taki fullt mark á þessu veit ég ekki, en það er alltaf gaman að gera svona gömul test Eins segja sumir að ég sé með ekta stelpukúlu á meðan aðrir segja að ég sé með strákakúlu. Þetta er allt kriss og kross. En bara gaman að þessu.

Um síðustu helgi pökkuðum við Helgi niður geymslunni og öllum myndum og smáhlutum. Það var rosalegur léttir að vera búin að því. Á morgun ætla ég svo að sækja fleiri kassa í Bónus svo við getum pakkað meira um helgina. Við fáum nefninlega bara næstu helgi til að pakka, því svo erum við flutt helgina eftir. Ótrúlega stutt í þetta og spennan verður bara meiri og meiri.

Svo væri ég alveg til í að fá smá kvitt frá ykkur sem lesið hvort sem það er við myndirnar eða við bloggið

En annars erum við búin að kaupa allar jólagjafir nema tengdó og hvort annað. Ég er líka búin að pakka inn öllum þeim sem eru komnar í hús, á bara eftir að kaupa merkimiða og setja á.

Þetta er allt saman að bresta á. Það er komin nettur fiðringur um mig. Sérstaklega þar sem ég fékk á hreint í dag að ég þarf ekki að koma suður milli jóla og nýjárs til að vinna, svo það verður bara haft það gott fyrir norðan. Enda er geggjað að geta sagt: ég flyt á aðfangadag hehe!

Annars erum við bara róleg hérna megin. Ég hef ekkert tekið nýjar bumbumyndir, en bæti úr því ASAP! núna erum við bara komin með stóra vél, að ég get ekki einu sinni tekið hana sjálf, því linsan er svo stór að ég næ ekki að fara nógu langt frá. Hehe Allt gengur samt rosa vel, en ég er farin að finna fyrir aðeins meiri þreytu. Ekkert til að kvarta yfir samt.

En, ég ætlaði bara að skella inn smá uppfærslu. Ég lofa að setja inn nýjar bumbumyndir um helgina.

Það verður ótrúlega skrítið að skreyta ekkert fyrir jólin. Ég fékk reyndar að skreyta í vinnuni um daginn, en það er samt ekki eins. Helgi er nú samt bara feginn held ég. Hann er ekki alveg jafn mikið jólabarn og ég. Svo styttist í að Elsa og fjölskylda komi heim í jólafrí. Það verður reyndar stutt en mikið hlakka ég til að hitta þau.

Það er samt ótrúlega fyndið hvað þessi mánuður hefur líðið fáránlega hratt. Mér finnst hann nýbyrjaður og það er bara ein vika eftir af honum. Fyrst í aðventu er á sunnudaginn eftir viku. Hversu geggjað er það? Og bara það að hafa fattað þetta, þá er ég orðin frekar spennt yfir því að komast heim.

Í næstu viku förum við svo í síðustu mæðraskoðunina hérna í RVK. Ég hlakka mikið til að fara í hana. Bumban hefur alveg tekið fínann vaxtakipp síðan í síðustu skoðun. Verður spennandi að fá að vita hvernig hjartslátturinn er. Samkvæmt mömmu var strákahjartsláttur í síðustu skoðun, svo hún er sannfærð um að þetta sé strákur. Ég er alls ekki viss og veit ekki alveg hvar Helgi stendur. Hann tala samt alltaf meira um hann heldur en hana, svo ég held að Helgi haldi að þetta sé strákur. Ein kona sem kemur vikulega í blástur á stofuna sagði í gær að hún verður alltaf sannfærðari um að þetta sé stelpa. Svo það eru mjög skiptar skoðanir.

Það væri alveg gaman að fá að vita hvað þið haldið að þetta sé. Endilega kommetið

-Góða helgi-

Út í aðra sálma. Það er greinilegt að Stöð 2 er að reyna að ná til sín áskrifendum. Sem er ekkert nema gott mál, en dagsskráin þeirra er búin að vera opin núna í 2 daga og mér skilst að hún eigi að vera það áfram alla helgina. Ég kvarta ekki yfir því. En mér finnst hins vegar að Skjár 1 þurfi að herða sig ansi mikið í sínum dagskrárliðum til þess að ég kaupi mér áskrift þar. Þeir þurfa að bæta dagsskránna yfir daginn til þess að mér finnist þessi 2200 kall þess virði. Ég ætla ekki að borga 2200 kr. á mánuði fyrir að horfa á tónlistarmyndbönd allann daginn. En ég vona að þetta bætist þegar stöðin læsist, því annars finnst mér allir þeir sem keyptu sér áskrift vera illa sviknir af peningum. Ég hugsa að ég myndi frekar kaupa mér Stöð 2 heldur en Skjá 1.
Annars horfði ég á Loga í beinni í kvöld og það var bara ansi góður þáttur. Leist ekkert smá vel á Ljótu Hálfvitana og Hvanndalsbræður. Hefði alveg verið til í að fara á Nasa og sjá þá, en var alltof löt þegar ég kom heim úr vinnuni. Ég mun sennilega sjá lengi eftir því.
Ég náði líka tæplega helmingnum af þættinum Marteinn, sem sýndur er á RÚV. Þetta var einmitt fyrsti þátturinn í kvöld og ég verð að viðurkenna að þetta lofar góðu. Ég gat alla vega hlegið helling og Helgi líka. Ég held reyndar að það hefði verið hægt að fá betri leikkonu í hlutverk Elísabetar. Mér finnst sú leikkona ekkert sérstaklega skemmtileg, en var svo sem allt í lagi að horfa á hana. Svo fannst mér hjúkkan (sem ég náði ekki hvað heitir) ekkert sérstök heldur. En Jói og Kjartan fannst mér standa sig ótrúlega vel. En þetta er bara fyrsti þátturinn og ég vona að þetta batni með skvísurnar í þáttunum. Ég sá líka ekki alveg byrjunina, svo þetta er bara það sem mér fannst af því sem ég sá.

-Nóg um þetta-

Ég ætlaði reyndar ekki að blogga svona langt, en svona getur maður misst sig. Ég hugsa að þetta sé bara gott í bili. Ég er búin að breyta aðeins í inní myndir 2009 og búin að bæta við athugasemdum þar. Svo þið sem hafið lykilorðið og eruð búin að skoða en ekki kvitta, getið kvittað núna við albúmið. Ég vil endilega sjá smá spor eftir ykkur

Á laugardaginn opnuðu Hildur vinkona og Árni Freyr nýja fataverslun á Akureyri. Það var svo opnunarpartý um kvöldið og ég lét mig að sjálfsögðu ekki vanta. Þetta er svaka flott búð og vonandi gengur þetta vel hjá þeim. Allir að kíkja í Indy Fataverslun í Hafnarstræti 100. Til hamingju Hildur og Árni Freyr.

Það er svo sem ekki mikið annað í fréttum. Styttist að sjálfsögðu í flutninga norður og við erum því byrjuð að huga að því að safna kössum og tilheyrandi. Ég vona að nóvember verði ágætlega fljótur að líða, því þá styttist enn meira í þetta.

Svo er að sjálfsögðu skylda að kvitta ef þú átt leið um. Það eru alveg slatti af fólki búin að fá lykilorðið á myndirnar, en enginn kvittar. Þannig að þið verðið að bæta úr því

Annars erum við bara orðin hress hérna. Ég sótthreinsaði íbúðina á sunnudaginn, ryksugaði, skúraði, þurrkaði af og skipti um á rúminu. Ekki veitti af þessari hreinsun, það er víst ábyggilegt. Ég var næstum því búin að næla mér í kassa og byrja að pakka. En ef ég verð nógu skipulögð get ég kannski byrjað að þrífa hægt og rólega. Ætla kannski ekki alveg að byrja núna, en svona um miðjan nóvember dembi ég mér í leiðinlegustu þrifin. Til dæmis þessar gardínur sem eru hérna eru KILLER leiðinlegar í þrifum! Ég er strax farin að kvíða fyrir þeim en fínt að reyna að taka þetta í skömmtum. Það eru ekki nema 8 vikur í þetta. Það þýðir 8 vikur til jóla! Úff, ég fékk bara fiðring í magann við að skrifa þetta Já þetta styttist óðum.

En við ætlum að skella okkur norður um helgina næstu og vonandi náum við að taka eitthvað með okkur. Helgi er með meistaragráðu í að raða skipulega í bílinn, svo við hljótum að ná að taka eitthvað. Við hvort sem er stoppum svo stutt, að það eru litlar töskur undir föt. En það verður æðislegt að komast aðeins heim og fá smá Akureyri í blóðið áður en ég dembi mér í jólatörn og tilheyrandi “stress” sem fylgir komandi tímum í vinnuni.

Annars hef ég ekki meira að segja í bili. Takk fyrir að kvitta þið sem kvittuðuð endilega allir hinir að kvitta núna